Luka 3

O Propoved e Jovan Krstiteleskoro

¹A ko dešupandžto berš taro vladiba e caroskoro o Tiberij, koga o Pontij Pilat sine upraviteli ki Judeja hem o Irod vladeteli ki Galileja, a oleskoro phral o Filip vladeteli ki Itureja hem Trahonitida, a o Lisanie vladeteli ki Avilinija; ²koga o Ana hem o Kajafa sine prvosveštenikja, e Devleskoro lafi alo dži ko Jovan, o čhavo e Zaharijaskoro, ki pustina.

³Hem ov džala sine po celo strana okolu o Jordan hem propovedinela sine pokajbaskoro krštevanje baši oprostiba e grevonge, ⁴sar soj tano pišimo ko lil e lafencar taro prorok Isaija, koj vakjerela:

⁷Ki adaja gužva pak, o manuša so avena sine te oven krstime olestar, vakjerela sine lenge: „Mileti sapeskoro! Koj vakjergja tumenge angleder baši holi so avela? ⁸Anen plodia dostojna baši pokajanie hem ma kjeren lafi akana ki tumende: ‘Isi amen e Avraame baši dat!’ Soske vakjerava tumenge, deka o Devel šaj hem taro akala bara te vazdel leske čhave e Avraameske. ⁹A hem o tover vekje pašljola ko koreno e kaštenge. Odoleske, sekova kaš so na dela šukar plodi, čhinelape hem frdelape ki jag.“

¹⁰A o narodo pučljale: „Togaš, so te kjera?“

¹¹A ov odgovoringja lenge hem vakjergja: „Kas isi duj šeja, neka del okoleske kas nae; hem kas isi hajbaske neka kjerel o isto!“

¹²Ale o carinikja te krstinelen hem vakjerge leske: „Učitele, so te kjera amen?“

¹³Ov vakjergja lenge: „Ma roden ništo poviše taro okova, soj tumenge tano odredimo!“

¹⁴Pučlele hem o vojnikja: „So te kjera amen?“

Hem vakjergja lenge: „Ma mučinen nikas, hem ma klevetinen, hem oven zadovolno tumare platencar!“

¹⁵A soske o manuša sine ki nada, hem sarine razmislinena sine ko ple srcia baši o Jovan – te nae tano ov o Hristos, ¹⁶o Jovan odgovoringja lenge sarinenge: „Me krstinava tumen pajneja; ama avela posilno mandar, Kaske me na sijum dostojno te phravav o kaiši Oleskere sandalendar; Ov ka krstinel tumen ko Sveti Duh hem jagaja. ¹⁷Ko Oleskoro vas i lopata tani, za da te očistinel Plo gumno hem za da te khedele o giv ko Plo ambar; a i pleva ka tharela jagaja so na ačhola.“

¹⁸Hem agjar propovedinela sine o Evangelie e narodoske, vakjeribaja hem but javera bukja. ¹⁹A o vladeteli o Irod, kas so ov kritikujngjale baši i Irodijada, i romni e Filipeskiri, leskere phraleskiri, hem baši o sa o bilačhe dejlja, so kjergjalen o Irod, ²⁰ko sa odova čhigja panda akava: phanlja e Jovane ko karanluko.

E Isuseskoro krštevanje hem rodoslovia

²¹Koga krstingjapes sa o narodo, krstingjapes hem o Isus, hem koga molinelape sine – o nebo phravdilo, ²²hem o Sveti Duh hulingja ki Leste, ko teloskoro oblik, sar gulubi, hem šungjape glaso taro nebo: „Tu sijan Mlo manglo Čhavo, ki Tute tani Mli milina.“

²³A o Isus sinele negde trijanda berš, koga počmingja te propovedinel hem sine – sar so mislinge - čhavo e Josifeskoro, e Ilijaskoro, ²⁴e Matateskoro, e Levijeskoro, e Melhijeskoro, e Janaskoro, e Josifeskoro, ²⁵e Matatijeskoro, e Amoseskoro, e Naumeskoro, e Eslimeskoro, e Nangejeskoro, ²⁶e Mateskoro, e Matatijeskoro, e Semeineskoro, e Josifeskoro, e Judaskoro, ²⁷e Joananeskoro, e Risajeskoro, e Zorovaveleskoro, e Salatileskoro, e Nirijeskoro, ²⁸e Melhijeskoro, e Adijeskoro, e Kosameskoro, e Elmodameskoro, e Ireskoro, ²⁹e Josijeskoro, e Eliezereskoro, e Jorimeskoro, e Matateskoro, e Levijeskoro, ³⁰e Simeoneskoro, e Judaskoro, e Josifeskoro, e Jonaneskoro, e Elijakimeskoro, ³¹e Melaskoro, e Mainaneskoro, e Matatijeskoro, e Nataneskoro, e Davideskoro, ³²e Jesejeskoro, e Ovideskoro, e Voozeskoro, e Salmoneskoro, e Nasaneskoro, ³³e Aminadadeskoro, e Arameskoro, e Esromeskoro, e Fareseskoro, e Judaskoro, ³⁴e Jakoveskoro, e Isakoskoro, e Avraameskoro, e Taraskoro, e Nahoreskoro, ³⁵e Seruheskoro, e Ragaveskoro, e Falekeskoro, e Evereskoro, e Salaskoro, ³⁶e Kainaneskoro, e Arfaksadeskoro, e Simeskoro, e Noeskoro, e Lameheskoro, ³⁷e Matusaleskoro, e Enoheskoro, e Jaredeskoro, e Maleleileskoro, e Kainaneskoro, ³⁸e Enoseskoro, e Siteskoro, e Adameskoro, e Devleskoro.