Luka 4

E Isuseskoro iskušenie

¹A o Isus, pherdo e Sveti Duhoja, irangjape taro Jordan, hem o Duho vodinelale sine ki pustina ²saranda dive, kote sine iskušimo taro beng. A ko odola dive na hala sine ništo, a palo odola dive, Ov bokhalilo.

³Togaš o beng vakjergja Leske: „Ako sijan Devleskoro Čhavo, vakjer akale bareske te ovel maro.“

⁴A o Isus odgovoringja leske: „Pišimoj tano deka o manuš na ka živinel samo mareja.“

⁵Hem ingargjale ko učipe hem sikagja Leske, ko isto momenti, sa o carstvia e svetoskere. ⁶Hem vakjergja Leske o beng: „Ka dav Tut sa o vlast hem olengiri slava, soske mange tani predajmi hem me davala kaske so mangava. ⁷Hem agjar, ako poklonineja Tut mange, sa ka ovel Tlo.“

⁸A o Isus odgovoringja hem vakjergja leske: „Naš Mandar, satano, soske tano pišimo: ‘Poklonin tut e Gospodareske, tle Devleske hem samo Leske služin!’“

⁹Hem ingargjale ko Erusalim hem čhigjale ko vrvo e Hrameskoro hem vakjergja Leske: „Ako sijan Devleskoro Čhavo, frde Tut akatar tele, ¹⁰soske tano pišimo:

¹²O Isus odgovoringja hem vakjergja leske: „Vakjerdoj tano: ‘Ma iskušinle e Gospodare, tle Devle.’“

¹³Hem otkoga završingja sekova iskušenie, o beng cidingjape Lestar baši nesavo vreme.

E Isuseskoro propoved ko Nazaret

¹⁴Hem o Isus irangjape, ki sila e Duhoskiri, ki Galileja hem o glaso baši Leste šundilo ki celo okolina. ¹⁵A Ov sikavelalen sine ko lengere sinagoge hem sarine proslavinenale sine.

¹⁶Hem alo ko Nazaret, kote so sine barilo; khugja ko sabotno dive ki sinagoga, sprema Plo običaj, hem uštilo te čitinel. ¹⁷Dengele o Lil taro prorok Isaija hem phragjale hem arakhlja o than kote so sine pišimo:

²⁰Phanlja o lil, irangjale e službenikoske hem bešlja, a o jajkha sarinengere ki sinagoga sine irame ki Leste. ²¹Hem počmingja te vakjerel lenge: „Avdije pherdilo akava Pismo, ko tumare kana.“

²²Hem sarine svedočinena baši Leske hem čudinenape sine baši o šuže hem gudle lafia, so iklovena sine taro Oleskoro muj. Hem vakjerena sine: „Nae li tano Akava o Čhavo e Josifeskoro?“

²³Hem vakjergja lenge: „Sigurno ka vakjeren Mange o lafi: ‘Doktore, saskjar tu tut korkori!’ Kjer hem akate, ko Tlo bijando krajo, sa so šungem deka kjergjan ko Kapernaum.“

²⁴Togaš vakjergja lenge: „Čače vakjerava tumenge, deka nijek proroko nae tano primimo ko plo bijando krajo. ²⁵Čače vakjerava tumenge – sine but udovice ko Izrael, ko vreme e Ilijaske, koga o nebo sine phanlo trin berš hem šov masek hem ulo baro bokhalipe ki celo phuv; ²⁶hem ki nijek taro olendar na sine bičhavdo o Ilija, a samo ki džuvli udovica ki Sidonsko Sarepta. ²⁷Isto sine but leprozna ko Izrael ko vreme e prorokoskoro o Elisej, ama nijek taro olendar na sine očistimo, osven o Sirico o Naaman.“

²⁸A koga šunge odova, sarine ki sinagoga pherdile holjaja ²⁹hem uštile, paldingele tari diz, hem ingargele ko jek rido, ko kova sine dzidimi olengiri diz, za da te frdenle tele. ³⁰Ama Ov nakhlja maškar lende hem gelo peske.

O Isus propovedinela hem kjerela čudia ko Kapernaum

³¹Hem hulingja ko Kapernaum, diz ki Galileja. Hem sikavelalen sine ki sabota. ³²Hem čudinenape sine baši Oleskiri nauka, soske Oleskere lafia sine silna.

³³A ki sinagoga sine manuš astardo taro nečisto duho demoni; ov vikingja silno glasoja: ³⁴„Eh, so isi amen amen Tuja – Isuse Nazareco? Dali aljan te uništine amen? Džanava, Koj sijan Tu: e Devleskoro Sveteco.“

³⁵A o Isus zapovedingja leske, vakjeribaja: „Kjutin hem ikljov olestar!“ Togaš o demoni e manuše frdingjale tele ko maškar hem iklilo lestar, hem ništo na kjergja leske.

³⁶Hem sarine darandile hem vakjerenajne jek jekeske: „Savoj tano adava lafi, vlasteja hem silaja zapovedinela e nečisto duhonge, hem ikljovena?“ ³⁷Hem širisalilo o glaso baši Oleste ko sa o thana ki okolina.

³⁸Hem uštilo tari sinagoga, khugja e Simoneske ko kher. A e Simoneskiri sasuj sine astardi tari silno treska hem zamolingele baši late. ³⁹Hem telilo ki late, hem naredingja baši i treska so sinela te mukela, hem oj mukljala, hem uštili odma hem služingja lenge.

⁴⁰A koga o kham zajdingja, sarine, kas isine nasvale taro razno nasvalipe angelen ki Leste. A Ov čhigja Pe vasta sarinende olende hem saskjargjalen. ⁴¹Hem bilačhe duhia ikljovena sine bute dženendar hem vikinena sine, vakjeribaja: „Tu sijan Devleskoro Čhavo.“ A Ov zabraninela sine lenge hem na dozvolinela sine te kjeren lafi, soske džanena sine deka Ovi tano o Hristos.

⁴²A koga sabajleskoro lelja te dikhjol, Ov iklilo hem gelo ko pusto than, a o narodo rodelale sine hem ale dži ki Leste, hem mangena sine te ikjerenle za da te na džal peske olendar. ⁴³A Ov vakjergja lenge: „Hem ko javera diza trebela te propovedinav lenge o Evangelie baši e Devleskoro Carstvo, soske Sijum bičhavdo baši odova.“

⁴⁴Hem propovedinela sine ko sinagoge ki phuv Judejsko.