O Isus vikinela e prvo učenikon

¹Jek puti, dži kote o narodo gurinelape sine ki Leste, za da te šunen e Devleskoro Slovo, a Ov tergjola sine uzo Genisaretsko Ezero, ²dikhlja duj brodia uzo brego. O ribajra sine iklile olendar hem čistinena sine o mreže. ³Ov khugja ko jek brodi, kova sine e Simoneskoro, zamolingjale te gurinele hari taro brego. Palo odova bešlja hem sikavelalen sine e narodo taro brodi.

⁴A koga čhinagja te kjerel lafi, vakjergja e Simoneske: „Te dža e brodeja ko hor pani hem frden tumare mreže baši te astaren mačhe!“

⁵O Simon odgovoringja Leske hem vakjergja: „Učitele, celo rat trudingem amen hem ništo na astargem; ama ko Tlo lafi, ka frdav o mreže.“ ⁶Hem koga kjerge odova, astarge doborom but mačhe, agjar so čhingjona sine o mreže lengere. ⁷Hem dengelen znako pe amalen, taro javer brodi, za da te aven hem te pomožinenlen. Hem ale hem phergelen solduj brodia, agjar so počminge te toninen.

⁸Koga o Simon Petar dikhlja odova, pelo anglo e Isuseskere kočaka hem vakjergja: „Dža Tuke mandar, Gospodar, soske sijum grešno manuš!“ ⁹Soske čudingepe ov hem sarine, koj sine Oleja, baši o astariba e mačhengoro so astarge. ¹⁰A isto agjar hem e Zavedeskere čhave, o Jovan hem o Jakov, koj sine e Simoneskere amala.

A o Isus vakjergja e Simoneske: „Ma dara! Otakana ka astare manušen!“ ¹¹Hem cidinge o brodia ko šuko, mukle sa hem gele pali Leste.

O Isus očistinela e leprozno manuše

¹²Hem koga sine ki jek diz, ekje, manuš celo leprozno, štom dikhljale e Isuse pelo ničkum hem zamolingjale, vakjeribaja: „Gospodar, ako mangeja, šaj te očistine man.“

¹³Togaš pružingja Po vas, dopringjale hem vakjergja: „Mangava, očistin tut!“ Hem odma i lepra peli olestar.

¹⁴Hem zapovedingja leske nikaske te na vakjerel, nego vakjergja leske: „Dža, sikav tut e sveštenikoske hem de žrtva baši so očistisaliljan, sar so zapovedingja o Mojsej, olenge baši svedoštvo!“

¹⁵A glaso baši Leske sa poviše šungjovela sine hem bari gužva narodo avela sine te šunele hem te saskjoven taro ple nasvalipa. ¹⁶A Ov cidelape sine ki pustina hem molinelape sine.

O Isus saskjarela astardo manuš ki postela

¹⁷Hem jek dive, dži kote sikavelalen sine, bešena sine o farisea hem e Zakoneskere učitejlja, koj ale taro sa o galilejska hem o judejska gava hem taro Erusalim. A e Gospodareskiri sila sine athe za da te saskjarelen.

¹⁸Hem ekje, o manuša ange ki postela astardo manuš hem dikhena sine te ingarenle hem te čhivenle anglo Leste. ¹⁹Hem soske na arakhle kotar te ingarenle baši i gužva so sine, uklile ko krovi hem muklele tari jek dupka barabar e postelaja, ko maškar angla ko Isus.

²⁰Koga dikhlja olengiri vera, vakjergja: „Manuša, oprostinenape tuke tle grevia.“

²¹Togaš o knižnikja hem o farisea počminge te razmislinen, vakjeribaja: „Koj tano Akava, Koj hulinela ko Devel? Koj šaj te oprostinel o grevia osven Jek Devel?“

²²A o Isus, koga džangja olengere misle, ko odgovor vakjergja lenge: „Soske razmislinena agjar ko tumare srcia? ²³Soj tano polesno te vakjerelpe: ‘Oprostinenape tuke te grevia’ ili ‘Ušti hem phir’! ²⁴Ama te džanen deka o Manušikano Čhavo isile vlast ki phuv te oprostinel o grevia,“ vakjergja e astardeske: „Tuke vakjerava, ušti hem vazde ti postela hem dža tuke ko tlo kher!“

²⁵Hem odma uštilo angli lende, lelja odova ko kova pašljola sine, hem gelo peske khere, slavibaja e Devle. ²⁶Hem ola sarine čudingepe hem slavinge e Devle hem – pherde daraja – vakjerena sine: „Avdive dikhlem čudna bukja!“

O Isus vikinela e Mateje - Levij*

²⁷Hem palo odova iklilo hem dikhlja e cariniko ko anav Levij*, sar bešela ki tezga baši khediba danoko, hem vakjergja leske: „Phir pali Mande!“ ²⁸Ov muklja sa, uštilo hem gelo pali Leste.

²⁹Hem o Levij kjergja Leske baro hajbe hem pijbe ko plo kher; sine hem but carinikja hem javera so bešena sine uzi sofra. ³⁰A o farisea hem olengere knižnikja žalingepe sine ko Oleskere učenikja, vakjeribaja: „Soske hana hem pijena e carinikoncar hem e grešnikoncar?“

³¹O Isus odgovoringja hem vakjergja lenge: „E sasten naelen potreba taro doktori, nego e nasvalen. ³²Na aljum te vikinav e pravednon, nego e grešnikon ko pokajanie.“

³³ A ola vakjerge Leske togaš: „E Jovaneskere učenikja postinena stalno, hem molinenape, agjar hem o farisejska, a Tle hana hem pijena?“

³⁴O Isus pak vakjergja lenge: „Šaj li te terinen e henamikon te postinen dži kote tano o džamutro olencar? ³⁵Nego ka aven dive koga o džamutro ka ovel lendo olendar; togaš ka postinen, ko odola dive.

³⁶A vakjergja lenge hem akaja parabola: „Nikoj na čhinela krpa taro nevo šej, za da te čhivel ko purano šej; inaku pharavela o nevo šej, a ko purano na bešela i krpa taro nevo.

³⁷Hem nikoj na čhorela nevi mol ko purane kože moljakere; inaku i nevi mol ka čhinel o kože e moljakere hem ka thavdel, a o kože e moljakere ka propadinen. ³⁸Nego nevi mol, trebela te čhorelpe ko neve kože moljakere, pa arakhenapes hem o prvo hem o dujto. ³⁹Hem nikoj – otkoga pilja purani mol – na mangela nevi, soske vakjerela: ‘I purani tani pošuži.’“

*Stiho 27: O Matej , ili Levij , tano isto manuš.