Parabole

¹Hem palem počmingja te poučinel uzo more. Hem khedingepes okolu Leste but narodo, agjar so khugja ko brodi hem bešela sine ko more, a celo narodo sine ki phuv, uzo more.

²Hem sikavelalen sine but parabolencar; hem vakjergja lenge ki Pli pouka: ³„Šunen! Ekje, iklilo sejači te sejnel. ⁴Hem koga sejnela sine, jek zrno pelo uzo drumo, hem ale o čiriklja hem halele.

⁵Javer pelo ki barali phuv, kote na sine but phuv; hem barilo sigate, soske na sine hor i phuv. ⁶A koga o kham izgrejngja, oveningja, hem soske na sine koreno šukilo.

⁷Hem javer pelo ko kare, hem o kare barile hem zagušingele, pa na angja plodi.

⁸A javer pelo ki šukar phuv hem angja plodi, koj napredujnela sine hem bajrola sine, hem prinesingja: jek trijanda, hem o javer šovardeš, a javer šel.“

⁹Hem vakjergja: „Kas isi kana te šunel, neka šunel!“

¹⁰A koga ačhilo Korkori, pučlele baši i parabola okola, koj sine okolu Leste e Dešuduje Dženencar.

¹¹Hem vakjergja lenge: „Tumenge tani dendi i tajna e Devleskere Carstvoskiri, a okolenge koj tane avrijal, sa ovela ko parabole, ¹²baši

‘dikhindor te dikhen hem te na dikhen;
hem šunindor te šunen, a te na hajljoven,
za da ma te pokajnenpes
hem te na ovel lenge oprostimo.’“

¹³Hem vakjergja lenge: „Na hajljovena li akaja prikazna? A sar ka hajljoven sa o parabole!

¹⁴O sejači sejnela o slovo. ¹⁵Odola, uzo drumo, kote so sejnelapes o slovo, tale odola kaste koj koga ka šunen – odma avela o satana hem lelale lendar hem legarelale o slovo, posejmo ki olende.

¹⁶Isto, o sejme upri barali phuv tale odola, koj – štom šunena o slovo - priminenale radosteja, ¹⁷ama naelen ki peste koreno, nego privremena tane, hem koga ka avel nevolja ili goniba baši o slovo, odma soblazninenapes.

¹⁸A o javera, soj tane sejme ko kare, odolaj tane okola, koj šunge o slovo, ¹⁹ama o svetska griže, hem o hovajba e barvalipaskoro, hem o želbe baši javera bukja, koga ka khuven zagušinenale e slovo, hem ačhola bizo plodi.

²⁰A o sejme ki šukar phuv tale odola, koj šunena o slovo, priminenale hem anena plodi: jek trijanda, hem jek šovardeš, hem jek šel.“

²¹Prodolžingja o Isus vakjergja lenge: „Zarem i momoli tharelape za da te učharelpe kapakoja, ili pak te čhivelpes telo kreveti? Zarem na tharelape za da te čhivelpes ko svetilniko? ²²Soske ništo nae tano garavdo, so nae te ovel otkrimo; ili soj tano tajno kjerdo, a te na iklol ko videlo.

²³Kas isi kana te šunel, neka šunel!“

²⁴Hem vakjergja lenge: „Pazinen so šunena! Save meraja merinena, asavkaja ka merinelpes tumenge, hem ka predodajnelpes tumenge, koj šunena. ²⁵Soske kas isi, ka delpes leske; a kas nae, ka lelpes lestar hem odova so isile.“

²⁶Hem vakjerela sine: „Agjar, e Devleskoro Carstvo tano sar koga manuš ka frdel seme ki phuv; ²⁷hem sovela hem uštela rakjate hem o dive, a o seme niknonela hem bajrola, a korkori na džanela sar. ²⁸I phuv korkori pestar anela plodi, najangleder steblo, posle klasi – palo odova klasi pherdo zrnoncar. ²⁹A koga o plodi resljola, odma bičhavela srpa, soske uli žetva.“

³⁰Hem vakjerela sine: „Soleja te sporedinav e Devleskoro Carstvo? Save parabolaja te prestavinale? ³¹Odovaj tano sar sinapovo zrno, so koga sejnelapes ki phuv, tano potikno taro sa o semia ki phuv; ³²ama koga tano posejmo, bajrola hem ovela pobaro taro sa o zelenčukja hem mukela bare granke, agjar so o nebesna čiriklja šaj te kjeren juve teli oleskiri senka.“

³³Bute asavke parabolencar vakjerela sine o slovo lenge, kobor so šaj te šunen. ³⁴A bizo parabole ništo na vakjerela sine lenge, ama nasamo objasninela sine lenge sa Ple učenikonge.

O Isus čhinavela i bura

³⁵Hem rakjakoro ko isto dive vakjergja lenge: „Te nakha tari javer strana.“ ³⁶Hem koga mukle e narodon lele e Isuse peja, sar so sine ko brodi; hem javera brodia sine Oleja.

³⁷Hem uštili silno bura, a o brajna prefrlinenapes sine ko brodi, agjar so o brodi vekje phergjola sine. ³⁸A Ov uzo kormilo sovela sine ko jastuko. Hem vazdingele hem vakjerge Leske: „Učitele, zar nae tuke griža, so amen meraja?“

³⁹Hem uštilo, zakaningjapes e bavlalake hem vakjergja e moreske: „Čhinav! Kjutin!“ Hem i bavlal čhinagja hem uli bari tišina.

⁴⁰Hem vakjergja lenge: „Soske darana doborom? Sar nae tumen vera?“

⁴¹Hem astargjalen bari dar, hem vakjerena sine jek javereske: „Koj tano Akava, so hem i bavlal hem o more pokorinenapes Leske?“