¹„Pazinen te na kjeren tumari pravednost anglo manuša, za da te dikhen tumen ola; inaku nae tumen nagrada taro tumaro Dat, Koj tano ki nebesa.

²Hem agjare, koga deja nekas te pomožine, ma trubin angli tute, sar so kjerena o licemejra ko sinagoge hem ko ulice, za da te oven slavime taro manuša. Čače vakjerava tumenge, isilen pli nagrada. ³A tu, koga deja nekas te pomožine, neka ma te džanel ti levica, so kjerela ti desnica, ⁴za da te ovel tlo dejbe ko tajnost; hem tlo Dat, Koj dikhela ko tajnost, ka nagradinel tut javno.

⁵Hem koga molinena tumen, ma oven sar o licemejra, koj mangena te molinenpes terdindor ko sinagoge hem ko kjušia taro ulice, za da te dikhenlen o manuša; čače vakjerava tumenge, isilen pli nagrada. ⁶A tu, koga molineja tut, khuv ki tli garavdi soba, phan o udara hem molin tut tle Dadeske, Koj tano ki tajnost; hem tlo Dat, Koj dikhela ko tajnost, ka nagradinel tut javno.

⁷A koga molinena tumen, ma koristinen čuče povtorime lafia sar o narodo; soske mislinena deka ka oven šunde baši o pobut lafia. ⁸Hem agjar, ma oven sar lende, soske tumaro Dat džanela soj tumenge tano potrebno, panda angleder te molinenle.

⁹Nego molinen tumen agjar:

‘Mo Dat amaro, Koj sijan ki nebesa, te svetinelpes Tlo anav;

¹⁰te avel Tlo carstvo, te ovel Tli vojlja, sar ko nebo, agjar hem ki phuv;

¹¹amaro šuko maro, de amen avdije;

¹²hem oprostin amenge amare bordžia, sar so hem amen oprostinaja amare bordžlijenge;

¹³hem ma ingar amen ko iskušenie, ama izbavin amen taro bilačho, soske Tloj tano o carstvo hem i sila hem i slava, ko sa o vejkja, amin!’

¹⁴Soske, ako tumen oprostinena e manušenge olengere prestapia, tumaro nebesno Dat ka oprostinel hem tumare. ¹⁵Ako tumen na oprostinena e manušenge olengere prestapia, ni tumaro Dat nae te oprostinel tumare.

¹⁶A koga postinena, ma oven ma-zmi sar o licemejra; soske ola kjerena ma-zmi plo muj, za da te dikhenlen o manuša deka postinena; čače vakjerava tumenge, isilen pli nagrada. ¹⁷A tu koga postineja, pomazin tlo šero hem thov tlo muj, ¹⁸za da te na dikhen tut o manuša deka postineja, ama tlo Dat, Koj tano ko tajnost; hem tlo Dat, Koj dikhela ko tajnost, ka nagradinel tut javno.

¹⁹Ma kheden barvalipe ki phuv kote so o molco hem i 'rgja uništinelalen, hem kote so o čora phagena, khuvena hem čorena, ²⁰nego kheden barvalipe ko nebo, kote so ni o molco, nitu i 'rgja na uništinelalen, hem kote so o čora na phagena, khuvena hem čorena; ²¹soske kote tano tlo barvalipe, odothe ka ovel hem tlo srce.

²²O svetilo e teloskoro tani i jak. Hem agjar, ako tli jak tani bistro, celo tlo telo ka ovel osvetlimo; ²³ama ako tli jak tani bilačhe, celo tlo telo ka ovel karanluko. Hem agjar, ako i svetlina, soj tani ki tute, tani karanluko, kobor bi ka ovel o karanluko!

²⁴Nikoj našti te služinel duje gospodarenge; soske ili jek ka mrzinele, a o javer ka mangele; ili ka ovel povrzimo jekeja, a o javer ka prezirinele. Našti te služinen e Devleske hem e mamoneske*.

²⁵Odoleske vakjerava tumenge: ma sekirinen tumen baši tumari duša, so ka han ili so ka pijen; nitu baši tlo telo, so ka uraven. Zar i duša nae tani poviše tari hrana, hem o telo taro šeja? ²⁶Dikhenlen e čiriklen nebesna! Ola nitu sejnena, nitu žnejnena, nitu khedena ko ambari, hem palem tumaro nebesno Dat paravelalen. Zar na sijen vredna but poviše olendar? ²⁷Koj tumendar šaj sekiribaja te prodolžinel plo život, makar samo jek saati?

²⁸Soske sekirinena tumen hem baši šeenge? Dikhen o polska lulugja sar bajrona; na trudinenapes, nitu pletinena; ²⁹a Me vakjerava tumenge deka ni o Solomon, ki celo pli slava, na uragjapes sar jek olendar. ³⁰Hem, ako o Devel uravela agjar i polsko čar, so avdije tani, a tajsa frdenala ki pečka, nae li but poviše tumen, tikneverakere?

³¹Hem agjar, ma sekirinen tumen, vakjeribaja: ‘So ka ha?’ Ili: ‘So ka pija?’ Ili: ‘So ka urava?’ ³²Soske sa odova rodena o narodia, soske tumaro nebesno Dat džanela deka tumenge tano potrebno sa akava. ³³Ama, roden prvo o carstvo e Devleskoro hem Oleskiri pravda, hem sa odova ka dodajnelpes tumenge.

³⁴Hem agjar, ma sekirinen tumen baši tajsutno dive, soske o tajsutno dive ka sekirinelpes baši peske. Dosta tano sekole diveske oleskoro bilačhipe.“

*Stiho 24: O lafi Mamon ki aramejsko čhip značinela o pare ili o barvalipa.