¹„Ma sudinen, za da ma te oven sudime. ²Soske save sudoja sudinena, asavkeja ka sudinelpes tumenge; hem save merkaja merinena, asavkaja ka merinelpes tumenge.

³Soske dikheja i tikni deljanka ki jak tle phraleske, a na dikheja i greda ki tli jak? ⁴Ili, sar ka vakjere te phraleske: Dozvolin mange te ikavav i tikni deljanka tari tli jak, a palem ekje, ki tli jak isi greda? ⁵Licemerno, ikav prvo i greda tari tli jak, pa togaš ka dikhe jasno, sar te ikave i tikni deljanka tari jak te phralestar.

⁶Ma den odova soj tano sveto e džukjelenge; nitu te frden tumare bisejra anglo bale, za da ma te gazinenlen pumare prencar, hem te iranenpes hem te kjeren tumen ko kotora.

⁷Molinen hem ka delpes tumenge; roden hem ka arakhen; khuven hem ka phravgjol tumenge. ⁸Soske sekoj koj molinela, dobinela; koj rodela, arakhela, hem okoleske koj khuvela, ka phravgjol leske.

⁹Ili, koj tano odova manuš maškar tumende, koj ple čhaveske ako rodela olestar maro, ka dele bar? ¹⁰Ili, ako rodela lestar mačho, ka dele li sap?

¹¹Hem agjar, ako tumen, koj sijen bilačhe, džanena te den šukar dajra tumare čedonge, kobor poviše tumaro Dat, Koj tano ko nebesia, ka delen šukaripa okolenge, koj molinenale?

¹²Hem agjar, sa so mangena te kjeren tumenge o manuša, kjeren olenge hem tumen agjar; soske odovaj tano o Zakoni hem o Prorokja.

¹³Khuven taro tesno udar, soske buvlo tano o udar hem isi but than o drumo, so vodinela ko propast, hem buti tane, koj khuvena olestar. ¹⁴Soske tesno tano o udar hem tesno tano o drumo, so vodinela ko život, hem but hari tane koj arakhenale.

¹⁵Pazinen tumen taro hovavne prorokja, koj avena tumenge ko bakhrane šeja, a andral tane grabliva ruva. ¹⁶Ka pendžarenlen palo olengere plodia. Khedelape li drakha taro kare, ili smokve taro bocke? ¹⁷Agjar, sekova šukar kaš bijanela šukar plodia, a o bilačho kaš bijanela bilačhe plodia. ¹⁸Našti šukar kaš te del bilačhe plodia, nitu bilačho kaš te del šukar plodia. ¹⁹Sekova kaš, ako na bijanela šukar plodia, čhinelapes hem frdelapes ki jag. ²⁰Hem agjar: ka pendžarenlen palo olengere plodia.

²¹Na sekoj, so vakjerela Mange: ‘Gospodar, Gospodar!’ ka khuvel ko carstvo nebesno, a okova, koj kjerela i vojlja Mle Dadeskiri, Koj tano ko nebesia. ²²But džene ka vakjeren Mange ko odova dive, ‘Gospodar, Gospodar, na prorokujngem li ko Tlo anav, na paldingem li demojna ko Tlo anav; hem na kjergem li but čudia ko Tlo anav?’ ²³Hem togaš Me ka vakjerav lenge: ‘Nikogaš Me na pendžargjum tumen; džan tumenge Mandar tumen, koj kjerena bezzakonie!’

²⁴Hem agjar, sekoj, koj šunela akala Mle lafia hem ispolninelalen, ka sporedinavle Me gogjavere manušeja, koj kjergja plo kher ko bar. ²⁵Hem dengja peske baro bršim, hem ale rekje, hem phudinge bavlala hem pele upro ko odova kher, ama odova na rušisalilo, soske sine kjerdo ko bar.

²⁶Hem sekoj koj šunela akala Mle lafia, a na ispolninelalen, ka ovel sporedimo bigogjakere manušeja, koj kjergja plo kher ki pošik. ²⁷Hem dengja peske baro bršim, hem ale rekje, hem phudinge bavlala hem pele upro ko odova kher, hem ov pelo, hem oleskoro periba sine baro.“

²⁸Hem koga o Isus završingja akala lafia, o narodo čudinelapes sine baši Oleskoro sikajbe; ²⁹soske sikavelalen sine sar Okova, Koj isile vlast, a na sar olengere knižnikja.