Psalm 139
Psalm 139
Devel Koj sa džanela
Baši o načalniko e pejačengoro. E Davideskoro psalmi.
1Gospodar, dikheja man celo hem pendžareja man,
2Tu džaneja koga bešava hem koga uštava, vekje duraldan džanejalen me misle.
3Dali džava ili pašljovava, Tu dikheja sa, pendžarde Tuke sa mle drumia.
4Dži kote mo lafi panda na alo dži ki čhip, a Tu, Gospodar, vekje sa džaneja.
5Tu opkružineja man, palo mande sijan, angli mande sijan, Tlo vas čhivdoj upra mande.
6Odova džandipa previše tano čudno baši mange, previše učo tano, za da te šaj te resavle.
O Devel tano segde
7Kote te džav taro Tlo Duho hem kote te našav taro Tlo muj?
8Ako voznesinava man ko nebo: odothe sijan, ako pašljovava telal ki phuv: hem odothe sijan.
9Ako lavalen o paka e rano sabaleskere hem selinava man ko krajo e moreskoro,
10hem odothe, Tlo vas ka vodinel man, Tli desnica ka ikjerel man.
11Ako vakjerava: „Neka garaven man o karanlukia,“ ama čak hem i rat ka ovel sar svetlo okolu mande!
12Ni o karanluko baši Tuke nae te ovel temno: i rat svetinela sar dive hem o karanluko tano sar svetlina.
13Soske Tu sozdajngjan andral so isi man, hem oformiringjan man me dajake ko vogi.
14Blagodarinava Tuke so sijum sozdajmo doborom čudesno, soj tane Tle dejlja šuže. Mli duša odova šukar džanelale.
15Mle kokala na sine Tuke garavde dži kote sozdajnava man sine ko tajno, kjerde hor ki phuv.
16Tle jajkha dikhle man pred te ovav ki suština, vekje sine sa pišimo ko Tlo lil; o dive sine mange odredime, panda dži kote na sine ni jek.
17Kobor tane mange vredna Tle plajna, Devla, kobor tane našti te računinav lengoro broj!
18Te gejnavlen, poviše tane tari pošik! Koga džangavgjovava, panda sijum Tuja!
19Devla, uništinlen e bilačhen, neka cidenpe mandar okola so mangena te len mo rat!
20Soske kjerena bunt garavutno protiv Tute, ko čučo vazdenapes Tle dušmajna.
21Gospodar, zarem te na mrzinavlen odola so mrzinena Tut? Zarem te na gadojnapes lendar Tle protivnikondar?
22Me mrzinavalen hor mržnaja, hem računinavalen baši mle dušmajna.
23Ispitin man celo, Devla, džan mo srce, ispitin man hem džan me phare misle:
24Dik te na džav palo bilačho drumo hem ingar man palo večno drumo.