Molitva baši tuga e pravednikoskiri

Baši o prvo muzičari. E Davideskoro Psalmi.

(Ko vreme ki nevolja.)

¹Ki Tute nadinava man, Gospodar, te na ladžakjerav man nikogaš: ikav man sprema Tli pravda!

²Čhiv paše ki mande Tlo kan, sigjar te oslobodine man! Ov mange cvrsto karpa baši zaštita, tvrdina baši o spasenie.

³Soske Tu sijan mli karpa, mli trvdina, baši Tlo anav vodin man hem upravin man.

⁴Cide man tari mreža so čhige mange tajno, soske Tu sijan mi sila.

⁵Ko Tlo vas predajnava mlo duho; Tu otkupingjan man, Gospodar, Devel e Čačipaskoro.

⁶Mrzinava okolen so poštojnena čuče idojlja, a me nadinava man ko Gospodari.

⁷Ka radujnav man hem ka veselinav man ko Tlo milost; soske Tu dikhljan mli nevolja, pendžargjan i tuga ki mli duša

⁸hem na predajngjan man ko vasta e dušmanenge, ikagjan me pre ko buvlo drumo.

⁹Smilujn Tut mange, Gospodar, soske sijum ko tesno, tari tuga slabonena mi jak, i duša hem o telo.

¹⁰Mo životo trošingjovela ko kjerkipa, a mle berša ko ofkiba. Mi sila geli ko muke, a mle kokala čhindile.

¹¹Baši sa mle protivnikja uljum lenge ponižime, baši asajbaske mle komšijenge hem te daran mandar o pendžarde; koj dikhena man sine avrijal, našena mandar.

¹²Sijum sine bisterdo sar mulo ko srcia e manušengere, uljum sar phago čaro.

¹³Šunava but džene kjerena mo lafi, užas sekotar: dogovorinenape protiv mande hem dikhena sar te len mo životo.

¹⁴A me, Gospodar, ki Tute nadinava man, vakjerava: „Tu sijan mo Devel!“

¹⁵Mle dive tane ko Tlo vas: ikav man taro vas mle dušmanenge hem taro okola koj goninena man.

¹⁶Neka svetinel Tlo muj ko Tlo sluga, spasin man Tle milosteja.

¹⁷Gospodar, te na ladžakjerav man deka povikujngjum Tut; neka ladžan o bilačhe; neka kjutinen telal ki phuv.

¹⁸Neka lalorgjoven o hovavne vošta, so protiv o pravedniko kjerena lafi drsko, ko baripa hem dikhena tut but tele.

¹⁹O, kobor tano baro Tlo šukaripa, so garavejale baši okola, koj darana Tutar, so spremingjan lenge okolenge, koj nadinenape ki Tute, anglo jajkha e manušengere čhavenge!

²⁰Garavejalen telo štiti Tle mujeskoro, taro manušengere bilačhe plajna; garavejalen ko Tlo šatori taro bilačhe čhibja.

²¹Blagoslovimo te ovel o Gospodari, soske javingja mange Pli čudesno milost, ki zorali diz.

²²Vekje pomislingjum, ki mli buna: „Otfrlimo sijum taro Tlo dikhiba.“ Ama Tu šungjan mo glaso tari mli molba, koga vikingjum Tut.

²³Mangenle e Gospodare sa Oleskere svetie; o Gospodari arakhelalen Ple vernon, a sprema i zasluga iranela okolenge, koj ponašinenape ko baro.

²⁴Oven hrabra hem Ov ka zojrakjerel tumare srcia, sarine, koj nadinena tumen ko Gospodari!