Psalm baši blagodarnost hem nadež

E Davideskoro Psalmi.

(Koga ov kjergjape delino anglo Avimeleh, koj paldingjale hem agjar gelo dur.)

¹Ka blagoslovinavle e Gospodare ko sekova vreme, Oleskiri pofalba uvek ka ovel mange ko muj!

²Mli duša ka falinelpe e Gospodareja: neka šunen adava o ponizna hem neka radujnenpe!

³Vazdenle ko baro e Gospodare mancar, zaedno te vazda upre Oleskoro anav!

⁴Rodingjum e Gospodare hem Ov šungja man, ikagja man tari sa mi dar.

⁵Dikhle ki Leste hem svetingja lenge anglo jajkha, hem na ka ladžakjerenpe o muja lengere!

⁶Akava bedno vikingja hem o Gospodari šungjale, ikagjale taro sa oleskere nevolje.

⁷E Gospodareskoro angeli kjerela straža okolu okola so darana Olestar, hem izbavinelalen.

⁸Ukusinen hem dikhen kobori tano šukar o Gospodari: blaženo tano o manuš, koj nadinelape ki Leste!

⁹Daran taro Gospodari, tumen Oleskere svetie, soske nae te falinel ništo baši okola so darana Olestar.

¹⁰O terne lavia trpinena beda hem merena bokhatar, a koj rodenale e Gospodare nae te trpinen te falinel lenge ništo.

Pazinen tumen taro grevo

¹¹Aven, čhavalen, hem šunen man, ka sikavav tumen baši dar taro Gospodari.

¹²O, manuša! Mangeja li o životo? Mangeja li but dive, za da te dikhe šukar?

¹³Ikjer ti čhip taro bilačhipe hem tle vošta taro hovavno lafikjeribe!

¹⁴Cide tut taro bilačhipe hem kjer šukar, rode mir hem dža pali leste!

¹⁵E Gospodareskere jajkha dikhena e pravednon, Oleskere kana šunena olengoro vikiba.

¹⁶E Gospodareskoro muj iranelape protiv o bilačhe, za da te uništinel lengoro spomen ki phuv.

¹⁷O pravednikja vikinena, o Gospodari šunelalen, izbavinelalen taro sa olengere bede.

¹⁸O Gospodari tano paše uzo okola soj tane phage srceja, hem spasinela okolen, soj tane pokajbaskere duhoja.

¹⁹E pravedniko isile but nevolje, ama o Gospodari ikavelale taro sa.

²⁰Ov arakhela sa oleskere kokala, nitu jek olendar nae te phagjol.

²¹O bilačhipe ka mudarel e neverniko, ka platinen ola so mrzinena e pravedniko.

²²O Gospodari izbavinela i duša Ple slugengiri hem nijek, taro odola so nadinenape ki Leste nae te oven osudime.