Ispit e verakoro

Baši o načalniko e pejačengoro, pali e Edutuna.

E Davideskoro psalmi.

¹Mli duša, o mir tano samo ko Devel, o spasenie tano samo ki Leste.

²Samo Ovi tano mli zaštita hem spasenie, mlo zoralo than: nae te pokolebinav man.

³Dži koga ka frden tumen upro manuš, za da te uništinenle sarine zaedno, sar razrušimo dzido ili navalimi ograda?

⁴Kjergepe lafi te frden man taro mlo učipe, uživinena ko hovajba; blagoslovinena mujeja, a dena armajna srceja.

⁵Mli duša, o mir tano samo ko Devel, mli nadež tani samo ki Leste.

⁶Samo Ovi tano mli zaštita hem spasenie, mlo zoralo than: nae te pokolebinav man.

⁷Ko Devel tano mlo spasenie hem slava; o Devel tano mi silno karpa hem than garajbaskoro.

⁸Nadinen tumen ki Leste, narodalen, ko sekova vreme, čhoren tumare srcia angli Leste: o Devel tano amaro than kote so šaj te garava amen!

⁹O čhave e manušengere tane suetna, hovajba tane o manušikane čhave: sarine te tergjoven ko kantari, ka oven polokhe tari sueta.

¹⁰Ma nadinen tumen te maltretirinen nekas hem silaja te len, nitu te falinen tumen suetno odova so čordoj; ako barilo tumaro barvalipe, tumaro srce neka ma te prilepinelpe ki leste.

¹¹O Devel vakjergja jek, a me šungjum duj: „I sila tani ko Devel!“

¹²Gospodar, ki Tute tano o šukaripa! Tu iraneja sekaske spored o dejlja.