Лука 2

Е Исусескоро бијанибе

¹А ко одова време иклили заповед таро царо Август баши попис баши са о житејља. ²Одова сине прво попис, кога о Квиринеј управинела сине ки Сирија. ³Хем сарине џана сине за да те пишиненпе, секој ки пли диз.

⁴Аѓаре хем о Јосиф гело тари Галилеја, тари диз Назарет, упре ки Јудеја, е Давидеске ки диз, кој тано ваќердо Витлеем, соске сине таро е Давидескоро кхер хем фамилија, ⁵те пишинелпе е Маријаја, и верими ромни олеја, која сине кхамни.

⁶А кога сине одори – ало време лаке те бијанел. ⁷Хем бијанѓа пе првобијанде Чхаве, па паќарѓале хем чхиѓале ки јек корпа баши хајбаске пус со чхивелапе, соске баши оленде најне тхан ки гостилница.

⁸А ко одова исто крајо овчајра раќарена сине авријал ко поле, аракхена сине пе бакхрен. ⁹Хем таро јек пути е Господарескоро ангели ало ленге хем е Господарескири слава осветлинѓален, па дарандиле бут. ¹⁰О ангели пак ваќерѓа ленге: „Ма даран, соске, еќе, јавинава туменге шукар хабери, баро радост, која ка овел баши са о народо: ¹¹соске авдије бијасалило туменге Спасители, е Давидеске ки диз, Кој тано о Христос* Господари. ¹²Хем акавај тано туменге знако: ка аракхен Бебе паќардо, сар пашљола ки корпа баши хајбаске пус со чхивелапе!“

¹³Хем таро јек пути е ангелеја але бари гужва небесно војска, кова фалинена сине е Девле, ваќерибаја:

¹⁵А кога о ангејља геле песке олендар ко небо, о овчајра ќерена сине лафи машкар песте: „Тогаш, те џа џи ко Витлеем хем те дикха со уло одорига, баши кова јавинѓа аменге о Господари!“

¹⁶Хем сиѓариндор але хем аракхлелен: е Марија хем е Јосифе, хем о Тикно Бебе сар пашљола ки корпа баши хајбаске пус со чхивелапе. ¹⁷А штом дикхле, ваќерге са со сине ленге ваќердо баши о Тикно Бебе. ¹⁸Хем сарине кој шунге, чудиненапе сине баши одова, со о овчајра ваќерге ленге. ¹⁹А и Марија запамтинела сине са акала лафиа хем размислинела сине баши ленге ко пло срце.

²⁰Хем о овчајра ирангепес, славибаја хем фалибаја е Девле, баши са со шунге хем дикхле, аѓар сар со сине ленге ваќердо.

²¹Хем кога ало о овтото диве, баши Олескоро обрезание, денгеле о анав Исус, сар со ваќерѓале о ангели, англедер те овел зачнимо ко воги.

Е Исусе аненале ко Храми

²²Хем кога накхле о диве таро лакоро очистиба, спрема е Мојсескоро Закони, ангеле ко Ерусалим, за да те денле англа ко Девел, ²³сар сој тано пишимо е Господареске ко Закони: ‘Секова мурш, кова бијанѓовела прво, те овел посветимо Леске е Господареске!’, ²⁴хем те ден жртва, сар сој тано ваќердо е Господареске ко Закони – ‘дуј гугутке или дуј гулубиа.’

²⁵Хем еќе, ко Ерусалим бешела сине мануш ко анав Симеон, хем одова мануш праведно хем побожно, кој уџарела сине е Израелескири утеха; хем о Свети Дух сине упри лесте. ²⁶Олеске о Свети Дух сикаѓа дека нае те дикхел мериба, џи коте на дикхелале е Христа* е Господарескоро. ²⁷Хем водимо таро Свети Дух ало ко Храми; хем кога о родитејља ангеле е Тикне Чхаве е Исусе, за да те ќерен упри Лесте о обичај е Законескоро, ²⁸лељале ке пле васта, благословинѓа е Девле хем ваќерѓа:

³³А о Јосиф хем и дај Лескири и Марија чудиненапес сине баши одова, со ќерела сине лафи баши Леске. ³⁴Хем о Симеон благословинѓален хем ваќерѓа лаке Олескере дајаке и Марија:

³⁶Сине хем и пророчица и Ана, е Фануилескири чхај, таро е Асирескоро племе; ој сине бут пхури, таро пло чхајипе е ромеја сине само ко брако евта берш, ³⁷а сар удовица џи ко овтовардешуштар берш, на мукела сине о Храми, служинела сине е Девлеске постеја хем молитваја и рат хем о диве.

³⁸Хем ко исто саати ој али хем славинѓа е Девле хем ваќерела сине баши Леске сариненге, кој аџиќерена сине о спасение е Ерусалимескоро.

³⁹Хем кога завршинге са спрема е Господарескоро Закони – ирангепе ки Галилеја ки пли диз Назарет.

⁴⁰А о Чхаво бајрола сине хем зојраѓовела ко духо сине, пхерѓола сине мудростеја, хем е Девлескири благодат сине Олеја.

⁴¹Хем секова берш Олескере родитејља џана сине ко Ерусалим ко празнико Пасха. ⁴²Кога синеле дешудуј берш геле, спрема о обичај ко Ерусалим, ко празнико.

⁴³Хем кога накхле о диве, ко ираниба кхере, о Чхаво о Исус ачхило ко Ерусалим, а Олескере родитејља на џанге баши одова, ⁴⁴него, мислинге декај тано машкар о патниќа, накхле јек диве друмо хем роденале сине машкар и фамилија хем о пенџарде.

⁴⁵Хем кога на аракхлеле, ирангепе ко Ерусалим те роденле. ⁴⁶Хем пало трин диве аракхлеле ко Храми сар бешела машкар о учитејља, шунелален хем пучелален. ⁴⁷А сарине кој шуненале сине чудиненапе сине баши Олескири годи хем со одговоринела сине.

⁴⁸Кога дикхлеле чудингепес хем и дај Лескири ваќерѓа Леске: „Мо Чхаво, со ќерѓан аменге аѓар? Дик! То дат хем ме мучингем амен, родиндор Тут.“

⁴⁹Ов ваќерѓа ленге: „Соске родена ман? Зарем на џанена дека Ме требела те овав ко одова, ковај сој тано Ме Дадескоро?“ ⁵⁰Ама ола на халилеле о лафи со ваќерѓа ленге.

⁵¹Хем хулило оленцар хем ало ко Назарет, хем сине ленге послушно. А Олескири дај пазинела сине са одола лафиа ко пло срце.

⁵²А о Исус џала сине англе ки мудрост, ко бајројбе хем ки благодат англо Девел хем англо мануша.

*Стихиа 11 хем 26: О Христос ко грчки значинела Месија, или Помазанико.