Лука 3

О Проповед е Јован Крстителескоро

¹А ко дешупанџто берш таро владиба е цароскоро о Тибериј, кога о Понтиј Пилат сине управители ки Јудеја хем о Ирод владетели ки Галилеја, а олескоро пхрал о Филип владетели ки Итуреја хем Трахонитида, а о Лисание владетели ки Авилинија; ²кога о Ана хем о Кајафа сине првосвештениќа, е Девлескоро лафи ало џи ко Јован, о чхаво е Захаријаскоро, ки пустина.

³Хем ов џала сине по цело страна околу о Јордан хем проповединела сине покајбаскоро крштевање баши опростиба е гревонге, ⁴сар сој тано пишимо ко лил е лафенцар таро пророк Исаија, кој ваќерела:

⁷Ки адаја гужва пак, о мануша со авена сине те овен крстиме олестар, ваќерела сине ленге: „Милети сапескоро! Кој ваќерѓа туменге англедер баши холи со авела? ⁸Анен плодиа достојна баши покајание хем ма ќерен лафи акана ки туменде: ‘Иси амен е Аврааме баши дат!’ Соске ваќерава туменге, дека о Девел шај хем таро акала бара те ваздел леске чхаве е Авраамеске. ⁹А хем о товер веќе пашљола ко корено е каштенге. Одолеске, секова каш со на дела шукар плоди, чхинелапе хем фрделапе ки јаг.“

¹⁰А о народо пучљале: „Тогаш, со те ќера?“

¹¹А ов одговоринѓа ленге хем ваќерѓа: „Кас иси дуј шеја, нека дел околеске кас нае; хем кас иси хајбаске нека ќерел о исто!“

¹²Але о цариниќа те крстинелен хем ваќерге леске: „Учителе, со те ќера амен?“

¹³Ов ваќерѓа ленге: „Ма роден ништо повише таро окова, сој туменге тано одредимо!“

¹⁴Пучлеле хем о војниќа: „Со те ќера амен?“

Хем ваќерѓа ленге: „Ма мучинен никас, хем ма клеветинен, хем овен задоволно тумаре платенцар!“

¹⁵А соске о мануша сине ки нада, хем сарине размислинена сине ко пле срциа баши о Јован – те нае тано ов о Христос, ¹⁶о Јован одговоринѓа ленге сариненге: „Ме крстинава тумен пајнеја; ама авела посилно мандар, Каске ме на сијум достојно те пхравав о каиши Олескере сандалендар; Ов ка крстинел тумен ко Свети Дух хем јагаја. ¹⁷Ко Олескоро вас и лопата тани, за да те очистинел Пло гумно хем за да те кхеделе о гив ко Пло амбар; а и плева ка тхарела јагаја со на ачхола.“

¹⁸Хем аѓар проповединела сине о Евангелие е народоске, ваќерибаја хем бут јавера буќа. ¹⁹А о владетели о Ирод, кас со ов критикујнѓале баши и Иродијада, и ромни е Филипескири, лескере пхралескири, хем баши о са о билачхе дејља, со ќерѓален о Ирод, ²⁰ко са одова чхиѓа панда акава: пханља е Јоване ко каранлуко.

Е Исусескоро крштевање хем родословиа

²¹Кога крстинѓапес са о народо, крстинѓапес хем о Исус, хем кога молинелапе сине – о небо пхравдило, ²²хем о Свети Дух хулинѓа ки Лесте, ко телоскоро облик, сар гулуби, хем шунѓапе гласо таро небо: „Ту сијан Мло мангло Чхаво, ки Туте тани Мли милина.“

²³А о Исус синеле негде тријанда берш, кога почминѓа те проповединел хем сине – сар со мислинге - чхаво е Јосифескоро, е Илијаскоро, ²⁴е Мататескоро, е Левијескоро, е Мелхијескоро, е Јанаскоро, е Јосифескоро, ²⁵е Мататијескоро, е Амосескоро, е Наумескоро, е Еслимескоро, е Нангејескоро, ²⁶е Матескоро, е Мататијескоро, е Семеинескоро, е Јосифескоро, е Јудаскоро, ²⁷е Јоананескоро, е Рисајескоро, е Зоровавелескоро, е Салатилескоро, е Ниријескоро, ²⁸е Мелхијескоро, е Адијескоро, е Косамескоро, е Елмодамескоро, е Ирескоро, ²⁹е Јосијескоро, е Елиезерескоро, е Јоримескоро, е Мататескоро, е Левијескоро, ³⁰е Симеонескоро, е Јудаскоро, е Јосифескоро, е Јонанескоро, е Елијакимескоро, ³¹е Меласкоро, е Маинанескоро, е Мататијескоро, е Натанескоро, е Давидескоро, ³²е Јесејескоро, е Овидескоро, е Воозескоро, е Салмонескоро, е Насанескоро, ³³е Аминададескоро, е Арамескоро, е Есромескоро, е Фаресескоро, е Јудаскоро, ³⁴е Јаковескоро, е Исакоскоро, е Авраамескоро, е Тараскоро, е Нахорескоро, ³⁵е Серухескоро, е Рагавескоро, е Фалекескоро, е Еверескоро, е Саласкоро, ³⁶е Каинанескоро, е Арфаксадескоро, е Симескоро, е Ноескоро, е Ламехескоро, ³⁷е Матусалескоро, е Енохескоро, е Јаредескоро, е Малелеилескоро, е Каинанескоро, ³⁸е Еносескоро, е Ситескоро, е Адамескоро, е Девлескоро.